8 ай эчендә Казанга 3,3 млн турист килгән

Сигез ай нәтиҗәләре буенча Казанга 3,3 млн турист килгән, бу 2024 елның шул ук чоры белән чагыштырганда 6% ка күбрәк. Казанга янәдән сәфәр белән әйләнеп кайтучы туристлар өлеше (Казанга 2 һәм аннан күбрәк сәфәр) 10,3% тәшкил иткән. 

Якынча 75% Россия төбәкләреннән килгән туристларга туры килә, аларның саны 2,5 млн кеше тәшкил иткән, бу узган ел күрсәткеченнән 5% ка югарырак (2,38 млн кеше). Агымдагы елда 10 субъект өлешенә (Мәскәү, Башкортостан Республикасы, Чуваш Республикасы, Мәскәү өлкәсе, Марий Эл Республикасы, Самара өлкәсе, Удмурт Республикасы, Ульяновск өлкәсе, Свердловск өлкәсе, Санкт-Петербург) туристлар агымының 59,5% тан артыгы туры килә. Үзәк федераль округ, Урал төбәкләре, шулай ук Түбән Новгород һәм Киров өлкәләре тарафыннан Казанга кызыксыну арта.

Казанга туристлык максатларында 30 меңнән артык чит ил гражданы килгән, күбесе Кытай, Төркия, Беларусь, Казахстан һәм Малайзиядән.

Керү агымының 73% тан артыгы туристларга туры килә (шәһәргә төн куну белән килү), ә 27% – экскурсия белән килүчеләргә (шәһәргә кыска вакытлы төн кунусыз бару). Сәфәрнең уртача озынлыгы 3 көн.

Сбераналитика мәгълүматлары буенча туристлар һәм экскурсантлар чыгымнары күләме (карталар буенча) 2025 елның беренче 8 аенда 29,1 млрд сум тәшкил иткән, бу 21,8% ка 2024 елның шул ук чорына караганда күбрәк. Туристларның көндәлек чыгымнарының уртача күләме тәүлегенә бер кешегә 3,27 мең сум тәшкил иткән, бу узган ел күрсәткеченнән 10% ка югарырак.

Чыгымнар структурасында кафе, бар һәм рестораннарда чыгымнар өлеше арткан, бу категориягә 28% туры килә. Җәмәгать туклануы объектларына туристларның 80% ка якыны йөри, ә уртача чек 1143 сум тәшкил иткән (2024 елга карата +14,3%). Калган категорияләр арасында азык-төлек кибетләрен, хезмәт күрсәтүләрне, күңел ачуларны, урнаштыру чараларын аерып күрсәтергә кирәк.

Казанда 8412 номерга (17376 урынга) 236 сертификацияләнгән урнаштыру чарасы һәм 3000 гә якын җәмәгать туклануы предприятиесе эшли. Ел ахырына кадәр ике эре кунакханә ачу планлаштырыла (Миллениум 4 һәм 5 йолдызлы). Алар кертелгәч, номерлар саны 401 номерга артачак.

Гыйнвардан августка кадәр кунакханәләрнең уртача йөкләнеше 57% тәшкил иткән . Гадәттәгечә иң югары күрсәткечләр май бәйрәмнәренә һәм җәй айларына туры килде, Аерым даталарда 90-100% ка җитте.

Агымдагы елның 8 аенда «Казан» халыкара аэропорты хезмәтләреннән 3 млн 549 мең пассажир файдаланган, бу узган елның шул ук чоры белән чагыштырганда 1,7% ка кимрәк. Хәзерге вакытта Казан аэропортында 49 эчке рейс, 31 халыкара рейс башкарыла.

Казанга автомобильдә килүче туристлар саны узган елның шул ук чоры белән чагыштырганда 4% ка арткан.

Агымдагы елның апреленнән августка кадәр 411 мең 273 пассажирга хезмәт күрсәткән Елга порты сизелерлек үсеш күрсәтә, бу узган елның шул ук чоры белән чагыштырганда 24,7% ка күбрәк.