Җәйге каникуллар вакытында укучыларга поездларга билетларга 50 процент ташлама биреләчәк

Мәктәп укучылары өчен җәйге сезонга билетлар инде сатыла башлаган.

(Казан шәһәре KZN.RU, 10-нчы март). Җәйге каникуллар чорында, 1-нче июньнән 31-нче августка кадәр, укучыларга поездларда йөрү өчен 50 процент ташлама биреләчәк. Ташламалы билет алу мөмкинлеге 10-17 яшьлек яшь пассажирларга кагыла. Мәктәп укучылары өчен җәйге сезонга билетлар инде сатыла башлаган.

Ташлама плацкарт, гомуми вагоннарга, утыру урыннары булган вагоннарга, шулай ук Россия территориясе буенча йөри торган моторвагон хәрәкәт составының (ерак араларга йөрүче электр поездларының) икенче һәм өченче класс вагоннарына (тиз йөрешле һәм югары тизлекле поездлардан тыш) билетлар сатып алганда бирелә. Транзит белән йөрүче поездларда ташлама Россия территориясе буенча бирелә.

Поездга утырганда пассажирга йөрү документын һәм шәхесне раслаучы документны күрсәтергә кирәк. 14 яшькә кадәрге пассажирлар туу турындагы таныклыкның нотариуста расланган күчермәсен бирә алалар.

Балалар өчен ташламалы билетны билет кассаларында, «Россия тимер юллары» ААҖ рәсми сайтында яки «Россия тимер юллары – Пассажирларга» мобиль кушымтасы ярдәмендә рәсмиләштерергә мөмкин. Ташлама «Тулы» тарифын күрсәткәндә һәм тиешле яшьтәге балалар турында мәгълүматлар керткәндә автомат рәвештә бирелә. Баланың сәяхәт көнендәге яше исәпкә алына.

Мәктәп укучылары өчен поездларда йөрү өчен ташлама инде бишенче ел кулланышта, дип хәбәр итә Россия тимер юллары» ААҖ филиалы – Горький тимер юлы матбугат хезмәте. 4 ел эчендә махсус тариф буенча 10 млн яшь пассажирга хезмәт күрсәтелгән.

Шулай ук укыгыз

Барлык яңалыклар