Чүплектән тере киңлеккә әверелде: «Миллениум» күпере астына 185 агач утырттылар

Чүплектән тере киңлеккә әверелде: «Миллениум» күпере астына 185 агач утырттылар

<p> Казанның Подлужная урамында «Миллениум» күпере астындагы территорияне төзекләндергәннәр – монда элек рөхсәт ителмәгән чүплек урнашкан булган. Вахитов һәм Идел буе районнары хакимиятләре көче белән кишәрлектә 185 агач: 70 юкә, 70 чыршы һәм 45 очлы яфраклы өрәңге утырттылар. </p> <p> Чистартылган зонаның гомуми мәйданы 4,8 мең кв.м тәшкил иткән. Участоктан 1319 куб.м чүп чыгарылган, дип хәбәр иттеләр районнарның матбугат хезмәтендә. </p> <p> Агачлар утыртылганнан соң, техника кермәсен һәм территория чүпләнмәсен өчен, монда чирәм чәчкәннәр һәм киртә куйганнар. </p> <p> «Без территорияне күпьеллык чүплектән чистарттык һәм яңа, тере киңлек булдырдык. Хәзер бу матурлыкны бергәләп саклап калу мөһим», – дип ассызыклады Вахитов һәм Идел буе районнары администрациясе башлыгы Альберт Салихов. </p> <p> Исегезгә төшерәбез, «Миллениум» күпере астындагы чүп 11 елга якын җыелуын дәвам иткән. ТР Экология һәм табигый байлыклар министрлыгына рөхсәт ителмәгән чүплек турында берничә тапкыр мөрәҗәгатьләр керде. </p>

2025-10-17T11:30:34+0300