Казан мэриясе Мәскәү Хөкүмәтенең «В кадре» («Кадрда») премиясе җиңүчесе булды

Финалга дәүләт корпорациясеннән, югары уку йортларыннан, дәүләт учреждениеләреннән һәм Россиянең әйдәп баручы банкларыннан 60 уңышлы HR карары үтте

Казан мэры Илсур Метшин шәһәр Башкарма комитетындагы аппарат киңәшмәсендә билгеләп үткәнчә, Казан күбесенчә Мәскәү белән идарә итү тәҗрибәсен үзләштерә.

«Безнең команда беренче урынны яулады һәм хезмәткәрләр белән идарә итү өлкәсендә премия алды. Мәскәү мэры Сергей Собянинга остазлык өчен рәхмәт белдерәсем килә – без чыннан да Мәскәү хезмәттәшләребездән күп нәрсәгә өйрәнәбез. Мәскәү барлык юнәлешләр буенча яңарышларны гамәлгә кертү буенча дөнья лидерларының берсе булып тора, алар аны гамәлдә уңышлы тормышка ашыра. Мәскәүдәге коллегаларыбызга рәхмәт, без бу эшне дәвам итәргә ниятлибез», – дип белдерде шәһәр башлыгы.

Шулай ук конкурста 2 урынны Дәүләт һәм Муниципаль Идарә Югары Мәктәбе алды.

Премия финалына барлыгы 60 уңышлы HR карары үтте. Татарстан башкаласы HR келәймәсен үстерүне, эчке һәм тышкы элемтәләр төзүне, шәһәр мэриясен җәлеп итүчән һәм ачык эш бирүче буларак танытуны үз эченә алган «Мин Казан командасында» проектын тәкъдим итте.

Программаның төп максатлары – Казан мэриясенең күренешен ныгыту, хезмәткәрләр өчен уңайлы һәм этәргечле мохит булдыру, «Казан командасы» келәймәсенә дәгъва кылучыларның тугърылыгын арттыру һәм кадрлар резервын формалаштыру. Шул исәптән проект дәүләт хезмәтенең яшьләр өчен түбән җәлеп итүчәнлеге, кадрлар кытлыгы, шулай ук хезмәткәрләрнең эшкә аз җәлеп ителүе проблемаларын хәл итәргә ярдәм итә.

Узган елда гына да шәһәр Башкарма комитеты бүлекчәләре җитәкчеләренең Казан югары уку йортлары һәм көллиятләре студентлары белән ачык очрашулары оештырылды, анда 7 мең кеше катнашты. Студентлар өчен шәһәр хуҗалыгы өлкәләре белән танышу өчен мэрия бүлекчәләренә 30 экскурсия үткәрелде. Шәһәр мэриясендә стажировка барышында алты студент эшкә урнашты.

Хезмәткәрләр өчен ел дәвамында 50дән артык корпоратив һәм аралашу чаралары оештырылган. «Шәһәр драйверлары» идарәче кадрларының эчке резервы формалаштырылды (46 финалчы), алардан 11 катнашучы соңгы 2 елда структур бүлекчәләрнең җитәкче вазифаларына билгеләнде инде.

Казан мэриясе Россиянең эре компанияләре арасында 28 нче һәм Татарстан Республикасы компанияләре арасында беренче урынны алып тора. hh.ru сайтында 170 вакансия бастырылган, аларга 19 меңнән артык җавап килгән, эшкә урнашу проценты – 60%.

Бүләкләү 3 октябрьдә «Синема Парк Мосфильм» мәйданчыгында узды. Быел Мәскәү мэры оештырган конкурска илнең 47 төбәгеннән командалар гариза биргән. Жюри «Федераль идарә тармаклары» һәм «Башкала» категорияләрендә барлыгы 24 лауреат һәм 12 җиңүчене билгеләде. HR мәсьәләләрендә чишелешләр эзләүдә булган хезмәткәрләр һәм җитәкчеләр уңышлы тәҗрибәләрне үзләштерә алсын өчен, иң яхшы проектларны Премия сайтында бастырачаклар.

Фоторепортаж

Эшлекле дүшәмбе, 06.10.2025

Шулай ук укыгыз

Барлык яңалыклар